Барањето за помилување на Катица Јанева е одбиено од претседателот Стево Пендаровски, додека нејзиниот адвокат и син, сè уште нема добиено одлука од Министерството за правда каде се поднесуваат барањата.
„Макфакс“ праша и во Министерството за правда, дали одлуката ја проследиле до адвокатот Јанев, оттаму очекуваме одговор. Од претседателскиот Кабинет посочуваат дека за помилувањето негативно мислење било дадено од Комисијата за помилување, па таква одлука донел и Пендаровски.
„Претседателот го одби барањето за помилување на Катица Јанева. Не се точни информациите дека било позитивно одговорено на барањето од Јанева од страна на Комисијата за помилување, односно и тие дале негативно мислење за нејзиното помилување“, информираат од Кабинетот на Пендаровски за „Макфакс“.
Адвокатот Лазар Јанев за „Макфакс“ посочува дека барањето за помилување го поднеле пред Нова Година.
„Немаме добиено никаков одговор. Имаме поднесено барање“, вели кратко Јанев за „Макфакс“.
Јанева побарала помилување како примерен затвореник кој ги почитува правилата на „Идризово“. Таа одлежа повеќе од половина од казната, а и остануваат уште три години до истекот на истата. Јанева беше шефица во Специјалното јавно обвинителство, потоа осудена во предметот „Рекет“ на седум години затвор.
