Претплатата како бизнис модел е сè почеста во денешно време, а тоа е особено изразено кај професионалните апликации.
Сепак, она што досега не сме го виделе е дополнителна претплата за функции кои до вчера ги земавме здраво за готово.
Минатата недела, Adobe ја отстрани поддршката за бесплатните бои на Pantone во Photoshop, InDesign и Illustrator, а при отворање на PSD-датотеките што ги содржат овие бои сега се прикажува црна боја - принудувајќи ги дизајнерите и артистите на кои им треба индустрискиот стандард да платат претплата.
„Pantone одлучи да го промени својот деловен модел. Некои палети на бои што се наоѓаа во Photoshop, Illustrator и InDesign се отстранети од ажурираните верзии по август 2022 година“, рече Ерин Ди Лева, портпаролка на Adobe. „За пристап до целосната палета на бои на Pantone, Pantone бара од корисниците да купат лиценца преку Pantone Connect и да инсталираат додаток користејќи Adobe Exchange.
Pantone во минатото тврдеше дека нивната колекција на бои во производите на Adobe не била правилно одржувана, поради што нивните бои биле неточни и дека недостасуваат стотици нијанси.
„Pantone и Adobe заеднички одлучија да ги отстранат застарените колекции и заеднички да се фокусираат на подобрување на искуството во апликациите“, се вели во делот ЧПП на веб-страницата Pantone.
Дизајнерите и артистите, кои разбирливо сакаат да продолжат да го користат индустрискиот стандард за бои, са се очекува да плаќаат 15 долари месечно (90 долари годишно) за лиценца за Pantone.
