Рекордни врнежи предизвикаа поплави на северот на сојузната држава Квинсленд, а властите очекуваат дека тоа всушност ќе биде најлошата поплава во историјата на овој австралиски регион, јавува BBC.
Илјадници луѓе се евакуирани, но многумина сѐ уште се заробени. Екстремните временски услови донесоа тропски циклон, а во некои области падна и годишното количество дожд. Фотографиите објавени на интернет покажуваат потонати авиони на аеродромот „Кернс“, како и крокодили кои се појавуваат во центарот на градовите. Исто така, луѓето бегаат од своите домови користејќи чамци.
Сѐ уште нема извештаи за исчезнати или загинати лица. Досега се спасени стотици луѓе, поплавени се многу куќи и патишта, прекинато е снабдувањето со електрична енергија, додека водата за пиење е при крај.
Од почетокот на невремето во Кернс паднаа повеќе од два метра дожд. Премиерот на Квинсленд, Стивен Мајлс, рече дека тоа е најлошата природна катастрофа на која може да се сети. Тој е особено загрижен за оние што се заробени во областите каде што нивото на водата расте, како што се оние во градот Вујал Вујал, на околу 175 километри од Кернс.
Девет лица, меѓу кои и болно дете, ноќта ја минале на покривот на болницата бидејќи спасувачката екипа не можела да стигне до нив. Сепак, тие беа спасени денеска, но властите тврдат дека целиот град мора да биде евакуиран.
Метеоролозите прогнозираат дека дождот ќе продолжи да паѓа, а и плимата ќе биде висока, што ќе влијае на пониските населби. Сепак, од вторник се очекува намалување на врнежите, но реките допрва треба да го достигнат највисокото ниво, а се очекуваат рекорди и во овој случај.
