Според последните информации, бројот на настрадани во нападот во Виена порасна на петмина починати, што значи дека починаа четири минувачи и еден напаѓач.
Информацијата е потврдена од австриското МВР, соопштено е дека четвртата жртва е жена. Во болница се наоѓаат 17 повредени од кои 7 се во критична состојба.
Во тек е полициска акција и се трага по осомничените. Напаѓачот од Виена е идентификуван како Кујтим Фејзулаи, за кого министерот за внатрешни работи Карл Нехамер потврди дека минатата година бил осуден поради обид да се приклучи на Исламска држава. Станува збор за 20-годишно момче чии родители се Албанци од Македонија, имал двојно државјанство и им бил познат на полициските органи од претходно.
На 22 април минатата година бил осуден на 22 месеци затвор поради обид да замине за Сирија и да се приклучи на ИД. На слобода бил пуштен на 5 декември, а му се судело како на малолетник.
Полицијата влегла во неговиот стан и по пребарувањето истиот е запечатен.
„Беше оружен со лажен експлозив, автоматска пушка и со мачета“, соопшти министерот.
Полицијата изврши претрес на домовите на терористите и приведе лица за кои се сомнева дека се поврзани со синоќешниот напад во Виена.
Не е јасно за колку напаѓачи станува збор, приведени се уште 12 луѓе и во тек е претрес на становите на осомничените.
