Тоа е тоа, претставен е најновиот модел на Renaultsport. Megane RS Ultimae, кој беше претставен на овогодинешниот салон за автомобили во Токио, е еден вид „лебедова песна“.
Серијата е ограничена на 1976 единици како потсетување на 1976 година, кога беше основан Renault Sport.
Токму така, RS заминува во историјата, но тоа не значи дека е крај за спортските модели. Имено, допрва ќе ги има, а ќе се нудат под брендот Alpine.
Кога станува збор за оваа специјална серија, да кажеме дека е базирана на изведбата на Trophy. Ќе се нуди во четири бои и тоа Star Black, Pearl White, Sirius Yellow и Tonic Orange. Надворешноста на автомобилот доби декорација во форма на детали во мат црна боја, како и натпис Ultimae.
Во кабината, седиштата на Recaro се покриени со титаниум сива алкантара со логото RS. Нова е табличката со ознаката на специјалната серија, а на неа е потписот на Лоран Хургон, возачот кој постигна рекорди во конкуренција на автомобили со погон на предните тркала на Нирбургринг, Сузука и Спа-Франкоршамп.
Ова е исто така автомобил со многу кратка листа на опции. Вклучено е сè, а дополнително се нудат само стаклен покрив и head-up дисплеј. За заштитна церада, под која многу примероци ќе го поминат најголемиот дел од својот живот, мора дополнително да се плати.
Штета, бидејќи овој автомобил е направен за уживање во возењето. Сè е подредено на брзината, од 1,8 бензинецот со 300 КС и 420 Nm, сопирачки Brembo, Cup суспензија, па сè до пневматиците Bridgestone Potenza S007 од верзијата Trophy R. Продажбата започнува оваа пролет, а цената уште не е објавена.