Американски воени авиони денеска со прелет над Скопје го поздравија членството на Република Северна Македонија во НАТО.
Два авиона на американското воено воздухопловство придружувани од два воени авиона на Република Грција, извршија прелет над територијата на Република Северна Македонија. Прелетувањето беше во чест на нашето членство во НАТО.
-Нашите американски сојузници испраќаат силна порака дека нашите две земји одржуваат одлична соработка и дека по континуираната поддршка што ни ја даваа на патот кон НАТО, и по влезот во Алијансата остануваат и понатаму наш силен сојузник и стратешки партнер, потенцира министерката за одбрана Радмила Шекеринска.
Американските авиони полетаа вчера од сојузната држава Јужна Дакота и имаа 30-часовен непрекинат лет со полнење гориво во воздух. Авионите над нашата земја летаа на височина од 1.500 метри.
Членството на Република Северна Македонија во НАТО започна со широка поддршка од страна на сојузничките земји, која се покажа и при здравствената криза од коронавирусот со бројни донации во медицинска и заштитна опрема од страна на сојузниците. Како нова членка на НАТО, Република Северна Македонија е опфатена и со програмата за воздушно патролирање која е ексклузивна само за членките на Алијансата и чија цел е заштита на небото на државите од НАТО.
