Кошаркарите на Грција синоќа последни се пласираа во четвртфиналето откако во Берлин во осминафиналето ја победија Чешка со 94:88. Претходно Италија го шокираше кошаркарскиот свет исфрлајќи ја фаворизираната Србија.
Најдобар кај Грците, нормално, беше Јанис Адетокунбо со 27 поени, 10 скока и 5 асистенции, додека Ник Калатес постигна 14 поени и имаше 5 скока и 6 асистенции. Јан Весели беше најефикасен кај Чешка со 21 поен, а Војтјех Хрубан имаше 17.
Италија со неверојатна прецизност во ударите за 3 поени ја среди Србија, исфрлајќи го еден од трите големи фаворити за титулата. Србија имаше +8 по првата четвртина, а потоа „Аѕурите“ полека ја топеа негативата за последната четвртина да ја добијат со +10 за конечни 86:94. Пирови беа 32-та поена на Никола Јокиќ, кој имаше и дабл-дабл учинок откако запиша и 13 скока.
Италијанците беа талични од зад линијата за 3 поени откако погодија дури 16 тројки од кои 6 беа дело на Марко Спису кој со 22 поена беше и најефикасен во победничкиот табор. По 3 тројки погодија Николо Мели (21 поен), Симоне Фонтекио (19) и Акиле Полонара (16), а една погоди Луиџи Датоме. Единствен кому не му одеа тројките кај Италија беше Алесандро Пајола кој од 3 обида не погоди ниту еднаш.
Србите реализираа 10 тројки од вкупно 29 обиди, лош учинок кој најмногу го набилда Василије Мициќ кој од 8 обиди успеа да промаши дури 7, а лош просек имаше и Марко Гудуриќ кој од 4 обиди не погоди ниту еднаш.
Претходно синоќа Финска ја ифрли Хрватска со 94:86 во натпревар кој го одбележаа 43-те поени на крилото на Јута Џез, Лаури Марканен, додека Полска со буквално истиот резултат ја елиминираше Украина.
Со оглед на тоа што во саботата се одиграа првите четири осминафинални натпревари, со синоќешните двојки се комплетираа сите парови за во четвртфиналето, натпревари кои ќе се играат во вторник и среда.
Четвртфинале:
Вторник, 17:15
Шпанија - Финска
Вторник, 20:30
Германија - Грција
Среда, 17:15
Франција - Италија
Среда, 20:30
Словенија - Полска
Во полуфиналето меѓу себе ќе играат победниците од вторник во едното, а оние од среда во другото. Финалето е закажано за в недела од 20:30 часот во „Мерседес-Бенц“ арената во Берлин, каде всушност се играат сите натпревари од нокаут-фазата.