Скијач на Алјаска со хеликоптер за спасување беше префрлен во болница откако преживеа напад на кафеава мечка.
Човекот бил дел од група алпинисти кои се искачувале на планина во близина на Хајнс, Алјаска, и за време на нападот се здобил со повреди на главата и раката.
Одделот за риби и дивеч на Алјаска соопшти дека жртвата ненамерно разбудила кафеава мечка во дувло, мајка која веројатно го штитела своето младенче.
„Откако мечката го нападнала скијачот, тој сфатил дека најдобро е да го примени старото добро планинарско правило – прави се дека си мртов – што се покажало како добра идеја“, изјави биологот Карл Кох за CNN.
Екипата за спасување со хеликоптер ги нашла нападнатиот човек и уште двајца скијачи на околу 10 километри северозападно од Хајнс на надморска височина од околу 490 метри.
Кога пристигнале спасувачите, жртвата сè уште била свесна. Двајца други скијачи му укажале прва помош и контактирале со крајбрежната стража.
„Користејќи го нивниот сателитски комуникациски уред, утврдивме прецизни GPS координати и надморска височина. Исто така, и што е важно, скијачите имаа светло обоена ткаенина со која му сигнализираа на пилотот на хеликоптерот. Тоа беше апсолутно клучно за да ги најдеме навреме“, изјави поручникот Вил Сирокман.
На другите двајца скијачи не им била потребна помош и сами се спуштиле по планината.