Претседателот на Уганда, Јовери Мусевени го разреши својот син Мухузи Кајнеругаба од местото командант на воените сили, соопшти денес армијата на Уганда.
Во соопштението со кое се најавува смена од позицијата командант на копнените сили, армијата објави дека Кајнеругаба од генерал-полковник е унапреден во генерал и дека ќе остане висок советник на претседателот за специјални операции.
Кајнеругаба постојано се закануваше на Twitter дека ќе изврши инвазија врз соседна Кенија, а исто така бараше и обединување на Кенија и Уганда . Откако неговите твитови предизвикаа реакција кај Кенијците на социјалните мрежи, истакна дека се шегувал.
Вчера на Twitter праша колку крави треба да даде на Џорџа Мелони, која се очекува да биде премиерка на Италија, за таа да ја прифати неговата брачна понуда.
„Веднаш би дал 100 крави за неа! Затоа што таа е бестрашна и вистинољубива“, напиша Кајнеругба на Twitter.