Семејните портрети на членовите на британската монархија со години зрачеа со кралски луксуз, а новиот божикен портрет на принцот Вилијам и Кејт Мидлтон со децата е сосема поинаков.
Фотографијата е дело на фотографот Мет Портеус, снимена е есенва во Анмер Хол, нивната резиденција во Норфолк, на истокот на Англија. Насмеани, опуштени, облечени во џемпери и кошули, принцот Вилијам и војвотката Кејт и нивните деца - принцот Џорџ, принцезата Шарлот и принцот Луи изгледаат како скромно „обично“ семејство, иако се далеку од тоа.
Сепак, во едно тие сигурно не се разликуваат од остатокот од светот. Дури и за британската кралица, принцовите и принцезите, војводите и војвотките, овој Божик ќе биде сосема поинаков.
Кралското семејство обично ги поминува празниците во Сандрингем, имот на кралицата Елизабета Втора во рурален Норфолк, околу 160 километри североисточно од Лондон, каде на кралицата обично ѝ се придружуваат нејзините деца, внуци и правнуци. Но, поради пандемијата оваа празнична сезона ќе биде поинаква.
Кралицата Елизабета Втора и принцот Филип, војводата од Единбург, годинава ќе го прослават Божик во нивната резиденција во замокот Виндзор, соопшти Бакингемската палата.
