Првиот iPhone на преклоп се очекува најрано во 2025 година, по преклопливиот iPad кој пристигнува во 2024 година.
Таблет на преклоп има повеќе смисла кај Apple отколку паметен телефон на преклоп во моментов, и има неколку причини за тоа. Како прво, iPhone на преклоп би бил неверојатно скап за да не ги канибализира другите модели, а истражувачката компанија CCS Insight проценува дека цената може да биде најмалку 2.500 долари.
Покрај тоа, постојат шанси првиот свитлив уред на Apple да има технички проблеми, па компанијата не сака да ризикува со својот најважен производ, а тоа е iPhone.
Исто така, воведувањето на механизам за преклопување треба да вдахне нов живот во линијата на iPad.
Многу извори и патенти укажуваат на фактот дека Apple истражува уреди на преклоп и дека е само прашање на време кога ќе претстави свој, без разлика дали станува збор за телефон или таблет. Исто така, јасно е дека овој уред на преклоп ќе биде многу скап.
Таблет на преклоп би можело да биде многу привлечна опција за клиентите бидејќи е нешто што другите компании сè уште не го нудат. Доколку Apple лансира iPad на преклоп во 2024 година, најверојатно ќе биде една од првите компании што ќе понуди таков уред, што значи дека нема да има многу ривали.
Исто така, линијата iPad има потреба од нови идеи повеќе од iPhone. Оваа година Apple воведе нов дизајн со објавувањето на iPhone 14 Pro и iPhone 14 Pro Max со нови форми на интеракција засновани на Dynamic Island кој го замени „забот“ претставен во 2017 година, меѓутоа, iPad Pro како најзначаен промена има нов процесор кој е доста „досадна“ надградба.
Сепак, iPad-ите се меѓу најдобрите таблети денес, но Apple мора порано или подоцна да ги „измеша картите“ за да ја задржи својата позиција на пазарот.
