Истражувачите на центарот Dossier успеале да го снимат тајниот имот на Путин во Карелија, република во северозападниот дел на Русија, долж границата со Финска, која е членка на нато од април, 2023 година.
Ова е прв пат имотот да биде детално фотографиран откако започна неговата изградба пред 10 години.
„Тајната северна резиденција на Путин во Карелија навлегува во сè повеќе заштитени подрачја, а нејзината територија е веќе двојно поголема од Монако“, напиша Антон Герашченко, советник на министерот за внатрешни работи на Украина, на X.
За „Путиновата дача“ во Карелија се знае од 2016 година, но до сега немаше детални фотографии и видеа. Неговите пријатели милијардери од Санкт Петербург, меѓу кои беше и Јуриј Ковалчук, почнаа да ја градат резиденцијата пред повеќе од десет години. Мештаните велат дека Путин овде се појавува барем еднаш годишно, по посетата на манастирот Валаам.
Според објавените документи, површината на резиденцијата е околу 1 квадратен километар, но земајќи ги предвид затворените шуми и заливи, вистинската површина е околу четири квадратни километри.
Водопадот Марџалахти, кој е висок четири метри, треба да биде дел од националниот парк, но пристапот до него е ограничен со ограда со бодликава жица и деноноќно обезбедување. Наспроти водопадот беше поставен видиковец за „сопственикот на водопадот“ да може сам да му се восхитува на бисерот на националниот парк, напиша Герашченко.
Во околината има три градби - колиба за рибари, штала и градина. Но по изглед не личат на колиба или штала, туку се изградени во модерен стил. Во близина на една од куќите има насип кој бил изграден по почетокот на војната. Новинарите претпоставуваат дека за заштита на Путин таму бил инсталиран противвоздушниот систем Pancir-S1.
