Една од најдолгите трансфер сапуници заврши со останувањето на Килјан Мбапе во ПСЖ.
Францускиот напаѓач веќе со месеци бираше помеѓу останување во Париз и заминување во Реал Мадрид. На крајот реши да ја прифати најголемата понуда во историјата на фудбалот и да остане во својата татковина.
ПСЖ не планира да застане на тој потпис. Следна цел е да го доведе Усман Дембеле, 24-годишниот француски офанзивец на кој му завршува договорот со Барселона. Le Parisien наведува дека втората цел е да го продаде Нејмар.
„ПСЖ е подготвен да го продаде Нејмар. Прашање е само дали ќе се појави клуб кој е подготвен да му ја даде на Бразилецот платата што ја сака“, пишуваат Французите, а шпанските медиуми наведуваат дека Нејмар вчера бил снимен на аеродромот во Барселона.
Нејмар (30) е најскапиот играч во историјата на фудбалот. ПСЖ го донесе од Барселона пред пет години за 222 милиони евра, а Бразилецот не успеа да ја оствари целта и да им ја донесе на Парижаните титулата европски првак. Тој има договор до 2025 година.
