Рускиот претседател Владимир Путин му предложи на американскиот претседател Џо Бајден да ја продолжат дискусијата, но под услов да биде јавно, онлајн.
Како што наведе тој, „ова ќе биде интересно за жителите на САД и Русија“.
„Имам идеја. Минатиот пат претседателот Бајден иницираше телефонски разговор. Сакам да му предложам на претседателот Бајден да ја продолжиме нашата дискусија, но под услов тоа да го направиме онлајн. Без никакви одложувања, туку искрено во отворена и јавна дискусија. Ми се чини дека тоа ќе биде многу интересно за жителите на Русија и САД, но сега и на жителите на други земји, рече рускиот лидер за телевизијата Russia-24.
Тој предложи дискусијата да се одржи утре или во понеделник.
„Не би го одолговлекувал состанокот, за викенд сакам да одам во тајгата за да се одморам малку, така што разговорот би можело да се одржи утре или во понеделник. Ние сме подготвени во кое било време што им одговара на Американците, а сега ќе дадам упатство и на Министерството за надворешни работи“, прецизираше рускиот лидер.
За потсетување, во интервју Џо Бајден на прашањето дали смета дека рускиот претседател е убиец, тој одговори „Да, го мислам тоа“.
Рускиот претседател Владимир Путин, пак, реагирајќи на изјавата на американскиот претседател Џо Бајден, на американскиот лидер му посака добро здравје.
„Ако гледаме пошироко на таа тема, во историјата на секој народ, секоја држава има многу тешки, драматични и крвави настани. Но, кога ги оценуваме другите или дури и кога ги проценуваме другите држави, другите народи, како секогаш да се гледаме во огледало. Секогаш таму се гледаме себеси. Бидејќи секогаш на другиот го префрламе тоа што самите го чувствуваме, тоа што сме во суштина“, нагласи Путин.