Рускиот претседател Владимир Путин за време на посетата на Душанбе во Таџикистан изјави дека неговата земја сака да ги подобри односите со талибанците.
„Правиме сè за да обезбедиме нормализирање на ситуацијата во земјата и се обидуваме да изградиме врски со политичките сили кои ја контролираат ситуацијата“, рече Путин, пренесе агенцијата Интерфакс.
Иако талибанците сè уште не се меѓународно признаени, тие владеат со голем дел од Авганистан од летото 2021 година, откако американската војска се повлече од земјата по повеќегодишна војна.
И покрај тоа што во Русија официјално се сметаат за терористичка организација, делегацијата на Талибанците присуствуваше на Меѓународниот економски форум во Санкт Петербург.
Посетата на Путин на Таџикистан, поранешна советска република, е негово прво патување во странство откако руските сили ја нападнаа Украина кон крајот на февруари. За време на разговорите со таџикистанскиот претседател Емомали Рахмон, рускиот претседател се осврна на „споделената одговорност“ за стабилноста во регионот. Русија има воена база во Таџикистан.
Денеска Путин патува за Туркменистан, уште една поранешна советска земја во регионот.
