Откако лидерите од Г7 претходно неделава ја исмеаја склоноста на рускиот претседател Владимир Путин да позира гол на фотографии, тој одлучи да им го возврати ударот.
Путин сугерира дека неговите колеги „мора да престанат со алкохолот и да почнат повеќе да се занимаваат со спорт“.
Во текот на прес-конференција во Туркменистан тој изјави:
„Не знам дали сакаат да се соблечат до половина или под струкот, но мислам дека во секој случај тоа би било одвратна глетка“.
Повикувајќи се на рускиот поет Александар Пушкин, додаде дека се сложува со тоа дека „можете да бидете паметна личност и да размислувате за убавината на своите нокти“, а потоа продолжи:
„Се во човекот треба да биде складно, и душата и телото. За да се постигне таа рамнотежа мора да се откажете од алкохолот, лошите навики и почнете да вежбате, да се занимавате со спорт“, објасни Путин.
Тој истакна дека споменатите колеги ги познава лично и дека моментално нема најдобар однос со нив.
„И покрај тоа, сите тие се лидери што значи дека имаат карактер. И ако сакаат сигурно ќе го постигнат посакуваниот напредок“, заклучи рускиот лидер.
Путин не се срами во јавност да го покаже своето тело разголено, а неколку пати е фотографиран како без маица јава коњ, носи ловечка пушта или оди на риболов.
Споменатите фотографии беа тема и на самитот на Г7 во Германија, кога британскиот премиер Борис Џонсон се пошегува на сметка на Путин.