Клубот од Дебар Маало има нови дресови за претстојната сезона која Работнички ќе ја почне утре, а презентацијата ја направи во интересен стил во својот дом во Градскиот парк.
„Природа, страст, триумф“, е мотото со кое е претставена новата опрема на Работнички. „Романтичарите“ ќе носат црвено-бела варијанта, а како резервни опции ги имаат белата и сината боја. Голманскиот комплет е е дреч жолта боја.
Домашниот дрес е оној што привлекува најмногу внимание. Работнички одамна немал дрес со вертикални линии, а токму таков ќе носи сезонава на домашните натпревари.
Како што доликува, дресовите се персонализирани, односно освен број секој играч на дресот го има и своето презиме. Единствена замерка е што презимињата се на латиница - многу подобро би било доколку се на кирилица.
Херојот од Дебар Маало летово донесе повеќе квалитетни засилувања и веќе се вбројува меѓу кандидатите за висок пласман. Редовите на „Црвените“ ги засилија Мевљан Мурати (Шкендија), Петар Петковски (Конкордија, Романија), Влатко Стојановски (Септември, Бугарија), Содик Антони Рашид (Скопје), Томче Гроздановски (ВиОн, Словачка), Егзон Белица (Приштина, Косово) и Кристоџеј Дејли (Харбор Вју, Јамајка).
Новата сезона Работнички ќе ја отвори в понеделник од 17 часот против силниот локален ривал Шкупи. Поради лошиот терен на арената „Тодор Проески“, дуелот мораше да биде преместен на „Борис Трајковски“ во населбата Маџари.