Не само неодговорно однесување на поединци кои ова место го користат за вршење нужда, туку и негрижа на институциите да се реши проблемот и пред сѐ да се исчисти местото.
Корисниците на Националната и универзитетска библиотека „Свети Климент Охридски“ во Скопје секојдневно се соочуваат со непријатен мирис и глетка ако доаѓаат од страната на Судот. А лицата кои користат количка или друг вид на помагало за да се движат се оневозможени да ѝ пристапат на библиотеката преку рампата, освен ако не сакаат да минат низ ѓубре и потоа буквално низ човечки измет.
Одредени лица оваа рампа во ноќните часови ја користат како јавен нужник. И тоа е веќе некое време, а никој не мрда со прст за да го реши проблемот. На рампата сѐ повеќе и повеќе се таложат гомна, што понатаму проблемот сигурно ќе резултира не само со лоша миризба, туку и со некоја зараза.
Ниту скалите десно од рампата не се во подобра состојба затоа што од олукот над нив редовно тече насобрана вода од дождови која веќе одамна почнала да остава траги на скалите кои од лизгавоста претставуваат и опасност доколку се користат.
Да потсетиме, НУБ „Свети Климент Охридски“ - Скопје е една од првите институции формирана со одлука на АСНОМ на 23 ноември 1944 година, кога практично Втората светска војна сѐ уште не била завршена. Денес библиотеката располага со богат фонд од илјадници разни изданија кои им се достапни на граѓаните, а во неа често се одржуваат манифестации и одбележувања на настани. Причина повеќе зошто зачудува негрижата за пристапот до оваа државна институција која е симбол на сѐ што некогаш било издадено во државава.
Оваа институција ја посетуваат не само студенти и истражувачи, туку и амбасадори и гости од странство. Да се надеваме дека никој од нив не оди од страната на Судот, покрај споменикот на Пере Тошев за да влезе во НУБ покрај Институтот „Конфучиј“ кој се наоѓа токму после рампата во склоп на НУБ. Ако некој во меѓувреме се реши да зачисти...
