Во светот продолжува рекорден топлотен бран, од Европа до Кина и САД, принудувајќи ги властите да преземат драстични мерки за справување со топлотните бранови и новите пожари, знаци на глобално затоплување.
Италија, од север кон југ, доживува топлотен бран со историски температурни рекорди кои се очекуваат во наредните денови, пишува француската новинска агенција AFP.
Во 16 градови ширум земјата денеска е прогласен црвен аларм, при што се очекува температурите да достигнат 36/37°C од Рим до Болоња пред врвот на топлотниот бран на почетокот на следната недела.
„Како во печка. Не може предолго да се стои на истото место предолго“, изјави за AFP во саботата наутро Вероника Нидерлови (16), чешка туристка во посета на Рим.
Италијанската влада ги советуваше сите во областите со црвен аларм да избегнуваат да бидат на отворено во средината на денот и да водат посебна грижа за постарите и ранливите.
Според весникот Il Messaggero, двајца фудбалери аматери, на возраст од 48 и 51 година, починале во петокот вечерта откако им се слошило, најверојатно поради жештините, за време на натпревари на југот на земјата.
Италијанскиот метеоролошки институт стравува од „најинтензивниот топлотен бран на летото, но и еден од најинтензивните на сите времиња“. Не треба да се поштеди ниту северот од полуостровот, а во вторник во Милано се очекуваат 38 степени Целзиусови.
Во Германија највисоки температури се измерени во саботата во баварскиот град Мерендорф-Клајнзебах (38,8°C). Дополнително, во Берлин се забележани 35°C и во Минхен 34°C, пишува германската агенција dpa.
Во Франција, министерот за земјоделство Марк Фесно беше силно критикуван во саботата, бидејќи увери дека температурите се „прилично нормални за лето“. Реагираа влијателни личности, како експертот за агроклиматологија Серж Зака.
„Кога нашите политичари ќе ги разберат и прифатат предизвиците на климатските промени? се пожали тој на Twitter.
Јуни беше вториот најтопол месец од почетокот на евиденцијата во Франција, каде што неколку департмани беа ставени во портокалова тревога поради топлотен бран во вторникот. И Грција страда од топлотен бран, кој ги принуди властите да го затворат Акропол во Атина во најтоплите часови во неделата трет ден по ред, кога температурите во земјата достигнаа над 41 степени Целзиусови.
Температурите во саботата надминаа 40 степени Целзиусови на 87 мерни станици, јави грчката новинска агенција ANA. Екипите на Црвениот крст, распоредени во подножјето на Акропол за да им помогнат на туристите, интервенираа „десетици пати“ за да ги спасат посетителите во последните денови.
Нов топлотен бран се очекува во Шпанија меѓу понеделник и среда по краткото одморање викендов на крајот на неделата, кога температурите надминаа 40°C во Андалузија на југот на земјата, како и на Канарските Острови каде беснеат пожари.
„Новиот бран ќе биде краток, но интензивен: Се очекува да надминеме 42°C“, напиша Метеоролошката агенција (Aemet) на Twitter.
Зафатена е и Северна Африка. Во Мароко до вторник се предвидува нов топлотен бран, а температурите ќе се движат меѓу 37 и 47°C во неколку провинции, соопшти Генералниот директорат за метеорологија (DGM).
Во Азија, неколку провинции во јужна и југоисточна Кина ќе имаат високи температури за време на викендот, кои ќе достигнат од 35 до 40 Целзиусови степени, соопшти Централната метеоролошка опсерваторија. На некои места на северозапад, во некои градови температурата би можела да надмине 40°С. Во Јапонија властите го повикаа населението да биде внимателно, бидејќи во недела и понеделник се очекува температурите да достигнат до 39°C на истокот на земјата.
На другата страна на светот, јужниот дел на Соединетите Американски Држави се пече на жештините: десетици милиони Американци, од Калифорнија до Тексас, трпат опасно високи температури кои се очекува да го достигнат својот врв во текот на викендот. Во Феникс, метрополата Аризона на југозападот на САД, во саботата беа забележани речиси 44°C, а метеоролозите очекуваат живата да достигне 46°C.
Во „Долината на смртта“ во Калифорнија, едно од најжешките места на Земјата, во недела се очекуваат нови високи температури, веројатно и до 54°C, по високите 48°C напладне во сабота. На југот на земјата, американските пожарникари од петокот се борат со неколку многу жестоки пожари, кои опустошија повеќе од 1.214 хектари и доведоа до евакуација на населението.
Во Јордан, погоден од топлотен бран кој во некои региони надмина 40 степени Целзиусови, службите за итни случаи се борат со шумските пожари.
На глобално ниво, месец јуни бил најтопол измерен, наведуваат европскиот Copernicus и американските агенции НАСА и НОАА. Тогаш првата цела недела од јули беше најтоплата досега забележана, според прелиминарните податоци на Светската метеоролошка организација (WMO).
Емисиите на стакленички гасови ја зголемуваат јачината, времетраењето и зачестеноста на топлотните бранови, велат експертите. Топлината е еден од најсмртоносните временски настани, соопшти WMO.
Само минатото лето во Европа високите температури предизвикаа повеќе од 60.000 смртни случаи, според една неодамнешна студија. Јужна Европа ќе продолжи да се поти следната недела бидејќи силниот топлотен бран не покажува знаци на намалување, пишува BBC.
„Температурите ќе го достигнат врвот помеѓу 19 и 23 јули - не само во Италија, туку и во Грција, Турција и на Балканот. Неколку локални рекорди за топлина во овие области би можеле да бидат срушени во текот на тие денови“, рече италијанскиот метеоролог и експерт за клима Џулио Бети за BBC.
Топлотниот бран во Европа ќе се прошири на Балканот подоцна следната недела - иако во неколку земји, како Србија и Унгарија, веќе има дневни температури кои се движат околу 35 Целзиусови степени.
Периодите на интензивни горештини поради глобалното затоплување стануваат се почести, поинтензивни и подолги.
„Топлинските бранови се зголемуваат секоја година по број и по интензитет... и тие се меѓу најопипливите, евидентни, документирани и јасно видливи знаци на климатските промени“, рече Бети.
„Европските лета станаа многу, многу пожешки во последниве години... Она што треба да не загрижува е дека лета без интензивни и продолжени топлотни бранови едноставно повеќе не постојат. ‘Нормалните“ лета станаа реткост.
