Шефот на руската вселенска агенција Роскосмос, Дмитриј Рогозин, тврди дека Русија може да ги уништи земјите-членки на НАТО за половина час, ако дојде до нуклеарна војна.
Рогозин, кој во последните неколку месеци даде многу необични и провокативни коментари, сподели порака на руски јазик на Telegram.
Рогозин тврди дека уништувањето би можело да се случи за половина час, „но тоа не смее да се дозволи бидејќи последиците од размена на нуклеарни удари ќе влијаат на состојбата на нашата Земја“.
Рогозин на Telegram напиша дека НАТО води војна против нив и иако јавно тоа не е објавено, на сите им е очигледно.
Неговите коментари не се во склад со ставот на НАТО кој во април објави соопштените во кое наведе дека „најостро се осудува инвазијата на Русија во Украина – која е независна, мирна и демократска земја, близок партнер на НАТО. Сојузот го повикува претседателот Путин веднаш да ја запре војната, да ги повлече своите сили од Украина без услови и веднаш да се вклучи во вистинска дипломатија“, стои во соопштението на НАТО.
Рогозин претходно изјави дека Роскосмос ќе ја напушти Меѓународната вселенска станица и дека таа одлука веќе е потврдена. Исто така ги критикуваше економските санкции од Западот, воведени кон Русија.
Тој во пораката додаде дека војната која Путин ја нарече „специјална воена операција“ е отидена далеку над првичното значење и географија и ја нарече „војна за вистината и правото на Русија да постои како единствена и независна држава“.