Фудбалерот од средниот ред на Борусија од Дортмунд, Марко Ројс, поради повреда нема да ѝ помогне на германската репрезентација на претстојниот Мундијал.
Според Sky Sport, 33-годишниот Ројс нема да може да учествува на Светското првенство поради повреда здобиена во средината на септември. Селекторот на Германија, Ханси Флик, до последен момент се надевал дека Ројс ќе закрепне, но играчот уште неколку недели нема да може да истрча на зелениот терен.
Ројс заработи повреда на лигаментите на скочниот зглоб во победата од 1:0 над Шалке на 17 септември. Четири недели подоцна, во мечот со Унион Берлин (0:2), тој се врати на теренот, влегувајќи како замена на полувремето. Сепак, по натпреварот почувствува болка. Минатата сабота, на 5 ноември, Ројс се врати на теренот по повреда – влезе како замена во 67. минута од натпреварот против Бохум (3:0). По тој натпревар, скочниот зглоб повторно почна да го боли.
Флик денеска го објави списокот на играчи кои ќе патуваат за Катар:
Да потсетиме, Марко поради повреда го пропушти Светското првенство во 2014 година, кое го освои Германија. Исто така, поради повреда, Ројс не играше на ЕУРО 2016 година. Тој го пропушти и ЕУРО 2020, наведувајќи го заморот по „исцрпувачката сезона“.
Мундијалот во Катар ќе се игра од 20 ноември до 18 декември.
