Со двата гола во мрежата на Ирска, Кристијано Роналдо сега собори уште еден рекорд и тоа оној на славниот Иранец за најмногу голови во дресот со националните бои.
Прашање на време беше кога Роналдо ќе го надмине и легендарниот Али Даји кој со своите 109 голови за репрезентацијата на Иран долго време беше светски број еден.
Синоќа неговата Португалија се мачеше, губеше дома од Ирска до самиот крај, но тогаш на сцена стапи Роналдо. Прво во 89. минута по нафрлување на Гонсалу Гедеш скокна со глава и заби за 1:1.
Потоа, длабоко во судиското надополнување, во 6. минута, Жуау Мариу нафрли, а Роналдо повторно ја надвисна збунетата ирска одбрана и погоди за победа.
Али Даји 15 години љубоморно го чуваше рекордот со 109 репрезентативни голови. Тој во својата играчка кариера од 1993 до 2006 одигра 148 натпревари за Иран и настапи на два Мундијала (1998 и 2006) и се зацементира како еден од најдобрите азиски фудбалери во историјата.
Роналдо својата репрезентативна авантура ја почна на 20 август 2004 година кога Португалија играше дома со Казахстан, а откако тогаш 18-годипниот Роналдо влезе во игра, Португалците успеаја да постигнат гол за победа. За првиот гол почека до ЕУРО 2004 и тоа на отворањето кога Грците приредија чудо и го совладаа домаќинот Португалија со 2:1, а токму единствениот гол за домаќините беше дело на Роналдо - во судиското продолжение и, нормално, со глава - начин кој се стане негов заштитен знак.