Кристијано Роналдо во големото видеоинтервју за Пирс Морган целосно се отвори за моменталната ситуација во неговиот клуб Манчестер Јунајтед.
Легендарниот Португалец сезонава целосно падна во втор план, а во еден момент беше исфрлен од тимот откако одби да влезе во игра како резерва.
„Манчестер Јунајтед ме изневери, од мене направија црна овца. Немам почит кон Ерик тен Хаг бидејќи ниту тој нема почит кон мене“, се најбомбастичните изјави на 37-годишниот Роналдо од ова интервју.
Тој објасни што мисли со тоа.
„Луѓето треба да ја знаат вистината. Јунајтед сакаше да ме брка. Не само тренерот, туку и луѓето околу клубот. Се чувствував изневерено. Некои луѓе не ме сакаа во Манчестер Јунајтед, не само оваа сезона, туку и минатата.“
Тој ја коментираше и комплетната ситуација во клубот.
„Нема напредок откако пристигнав. Откако си замина сер Алекс, клубот воопшто не еволуираше. Ништо не се промени. Навивачите треба да ја знаат вистината. Го сакам најдоброто за клубот и затоа дојдов, но некои работи внатре во клубот не му помагаат да дојде до нивото на кое се Сити, Ливерпул и сега Арсенал. Ваков клуб треба да биде на врвот, но во моментов не е“.
„Како што рече Пикасо, треба да уништиш нешто за да го изградиш повторно. Ако сакаат да почнат со мене, тоа не ми е проблем. Го сакам Јунајтед, ги сакам навивачите, тие секогаш се на моја страна. Но, ако сакаат за да се подобрат во Јунајтед, мора многу да се менуваат, многу... Сер Алекс го знае тоа подобро од кој било. Сите го знаат тоа. Луѓето кои не го гледаат тоа или не сакаат или се слепи“, рече тој, па продолжи:
„Зошто се вратив? Го следев своето срце. Сер Алекс ми рече дека е неприфатливо да одам во Манчестер Сити. ‘Во ред, шефе’, му одговорив. Навивачите се за мене. Затоа решив да дадам ова интервју затоа што мислам дека е вистинско време да го кажам она што ми е на ум“.
Роналдо објасни како пропуштил дел од подготовките на Јунајтед за сезоната бидејќи неговата тримесечна ќерка била во болница.
„Ќерка ми беше во болница во јули, сакав да бидам со неа. Поединци од раководството на клубот се сомневаа во тоа. Клубот не покажа емпатија, бев повреден“.