Откако Владимир Путин ѝ нареди на руската армија да ги стави своите сили во висока готовност за нуклеарно одвраќање, се појавија шпекулации дека Пентагон прогласил Defcon 2 во неделата, што значи чекор од нуклеарна војна.
Сепак, ваквата информација не е официјално потврдена бидејќи од безбедносни причини американските власти никогаш јавно не го кажуваат степенот на опасност за земјата. Defcon 2 досега беше прогласен само двапати, за време на кубанската ракетна криза и Заливската војна. Вчера наутро тој степен на опасност беше спуштен, па сега е Defcon 3, што значи зголемување на воената готовност над нормалата.
А Defcon 3 досега е најавен само неколку пати. Defcon (Defense Ready Condition) е систем што го користи Пентагон за да го означи нивото на закана од нуклеарна војна со која се соочуваат Соединетите Американски Држави, а тоа потоа ја одредува подготвеноста за потенцијален одговор.
Има пет нивоа, од Defcon 1 до 5. Defcon 5 е најниската состојба на подготвеност, а Defcon 1 е максимална подготвеност, што значи дека нуклеарната војна започнува или веќе започнала. Defcon1 никогаш претходно не бил деклариран, но Defcon 2 е активиран двапати. Defcon2 првпат беше прогласен на 24 октомври 1962 година, а ова ниво на опасност траеше до 15 ноември 1962 година, за што беше напишана книгата „DEFCON-2: Standing on the Brink of Nuclear War During the Cuban Missile Crisis“ во 2006 година.
Defcon 2 беше прогласен по втор пат на 15 јануари 1991 година, на почетокот на Заливската војна, односно операцијата Пустинска бура, кога меѓународната коалиција предводена од САД го нападна Ирак. Defcon 3 првпат беше прогласен за време на војната во Јом Кипур или Октомвриската војна, во која коалицијата на арапски држави, предводена од Египет и Сирија, учествуваше против Израел од 6-25 октомври 1973 година.
Исто така, Defcon 3 беше прогласен за време на терористичкиот напад на САД на 11 септември 2001 година, а тоа ниво на готовност беше задржано до 14 септември 2001 година.