Од утре со работа ќе започнат уште 50 ресторани откако новиот руски сопственик ги преименува поранешните ресторани на McDonald's во Русија во „Вкусно и точка“.
По повеќе од 30 години, McDonald's си замина од Русија како реакција на воениот конфликт во Украина.
„Новото име е „Вкусно и точка“, изјави на прес-конференција генералниот директор Олег Паројев.
Сопственикот Александар Говор изјави дека вработените во поранешните ресторани на McDonald's ширум Русија ќе си ги задржат работните места.
„Многу сум горд што ми е дадена чест да ја развивам оваа фирма. Амбициозен сум и предвидуваме не само да отворам 850 ресторани, туку и да развивам нови“, изјави Говор.
Шеесет и двегодишниот Говор досега беше сопственик на 25 McDonald's ресторани во повеќе градови во Сибир.
Поради инфлацијата во Русија, Паројев изјави дека цената на хамбургерите ќе биде малку повисока за разлика кога рестораните беа под американска управа, но вети дека цената ќе остане достапна за сите.
McDonald's привремено ги затвори рестораните со 62.000 вработени во Русија кон почетокот на март, а кон средината на мај објави дека дефинитивно се повлекува од таа земја. Сите 850 ресторани ги продаде на Говор, оправдувајќи се пред одлуката за потребата да „остане решителен кога станува збор за вредностите“.