Портпаролката на Стејт департментот, Морган Ортагус, без да демантира конкретни објави во медиумите, излезе со соопштение дека медицинската опрема која денеска стигна од Русија во САД, е купена врз основа на договорот меѓу американскиот и рускиот претседател, Доналд Трамп и Владимир Путин.
Таа додаде дека опремата што стигна со руски транспортен авион и која вклучува вентилатори и лична заштитна опрема, не е подарок.
– Двете земји си давале хуманитарна помош една на друга во кризни периоди и без сомнеж тоа ќе го прават повторно во иднина. Ова е време за соработка во надминување на заедничкиот непријател кој ги загрозува животите на сите нас, нагласи Ортагус.
Таа не соопшти колку САД ја платиле медицинската опрема, која е предадена на Сојузната агенција за управување во кризни ситуации во Њујорк, откако руски товарен авион ја пренесе до меѓународниот аеродром Џон Ф. Кенеди.
Ортагус истакна дека САД ќе продолжат да им помагаат на другите земји во борбата против новиот коронавирус.
Рускиот амбасадор во Вашингтон, Анатолиј Антонов вчера изјави дека испораката ја одразува потребата за обединување на глобалните напори во борбата против COVID-19, без оглед на политичките разлики.
