На 18 јануари и 1 февруари Samsung ќе ги одржи премиерите на новите уреди Galaxy A и Galaxy S.
Се чини дека паметните телефони на Samsung за 2023 година се најлошо чуваната тајна. Откако пред неколку месеци имавме можност да видиме како ќе изгледаат нивните нови телефони, сега се познати датумите на две премиери, од кои едната по грешка ја објави јужнокорејскиот гигант.
Samsung случајно објави дел за предрегистрација на колумбиската верзија на својата веб-страница, каде посетителите можеа да го видат датумот на Unpacked настанот на кој ќе бидат претставени уредите Galaxy S23 - 1 февруари 2023 година.
Сепак, пред светот да има шанса да ја види презентацијата на најдобрите уреди што ги нуди Samsung, љубителите на паметни телефони ќе имаат шанса да видат два уреди од средната класа - Galaxy A54 и Galaxy A34.
Компанијата објави дел за индиската верзија на страницата во која ја најавува премиерата на новите Galaxy A уреди, која ќе се одржи на 18 јануари во 8 часот по наше време.
Како што веќе имавме можност да видиме, новите поевтини модели ќе изгледаат многу слично на уредите Galaxy S23, но моделот Galaxy A34 5G не се очекува да донесе некои драстични промени во спецификациите. Екранот Super AMOLED ќе биде малку поголем (6,5 инчи наместо 6,4), ќе се освежува на 90 Hz и ќе има Full HD+ резолуција. Според гласините, се очекува да се напојува со чипсет Exynos 1280 и да доаѓа во конфигурации со 6 или 8 GB RAM и 128 или 256 GB внатрешна меморија. Главната камера ќе биде оптички стабилизиран сензор од 48 MP, додека секундарните камери ќе бидат ултра широки 8 MP и макро 5 MP. Предната камера од 13 MP ќе биде одговорна за селфи.
Од друга страна, се очекува дијагоналата на Super AMOLED екранот на телефонот Galaxy A54 5G да биде 6,4 инчи, со Full HD+ резолуција и стапка на освежување од 120 HZ, а системот на камерата да се состои од оптички стабилизиран примарен сензор од 50 MP, камера со ултра широк агол од 12 MP, макро сензор од 5 MP и селфи камера од 32 MP. Наводно, батеријата ќе има капацитет од 5.100 mAh, а ќе се напојува од чипсет Exynos 1380 поврзан со 6 или 8 GB RAM и 128 или 256 GB внатрешна меморија.
Двата модели од средната класа се очекува да имаат сензор за отпечатоци под екранот, стерео звучници, IP67 заштита од вода и прашина, 5G, GPS, Wi-Fi 5, Bluetooth 5.2, USB-C и 25W брзо полнење.
