Фудбалскиот клуб Лестер е најголемото разочарување во Премиер лигата. Клубот кој пред седум години сензационално ја освои титулата, пред 10 дена испадна од лигата.
Во клубот има неколку исклучително квалитетни фудбалери, кои високо котираат на пазарот. Јасно е дека тие нема да останат во Лестер, туку ќе бидат продадени. Станува збор за Харви Барнс и Џејмс Медисон. Медисон е на списокот на повикани фудбалери кај селекторот Гарет Саутгејт за јунските ЕУРО квалификации, каде Англија ќе игра и против Македонија.
Клубот наведе седум играчи, кои на крајот од сезоната нема да бидат членови на тимот предводен од Дин Смит.
Јури Тилеманс и Ча'лар Сојунџу се слободни играчи, Турчинот во јануари се договори со Атлетико и тој наскоро ќе биде промовиран во Мадрид. Покрај овие двајца, во клубот надрената сезона сигурно нема да бидат Даниел Амарти, Нампалис Менди, Рајан Бертранд, Ајозе Перес и Тете.
Клубот исто така посочи дека моментално е во преговори со капитенот Џони Еванс за продолжување на договорот.
Лестер претходната сезона ја заврши на 18. место на табелата во Премиер лигата и заедно со Лидс и Саутемптон следната сезона ќе игра во Чемпионшип каде ќе се бори за експресно враќање во елитата.
Најголемата ѕвезда во тимот, напаѓачот Џејми Варди, се очекува да остане во клубот и да му помогне да се врати во Премиер лигата. Голгетерот изминативе 11 сезони играше за Лестер, вклучително и првите две кога клубот беше во Чемпионшип. Сезонава не беше во форма, постигна само 3 гола на 37 натпревари, но често влегуваше како замена бидејќи редовно гоп мачеа ситни повреди.