Орландо Меџик за прв пат во историјата повлече дрес на еден кошаркар, а таа чест синоќа пред почетокот на натпреварот со Оклахома Сити Тандер му припадна на легендарниот Шекил О'Нил.
Поранешниот американски центар (51) пристигна во Орландо во 1992 година како прв пик од НБА драфтот, каде ги мина следните четири сезони, за да ја продолжи кариерата играјќи за Лос Анџелес Лејкерс, Мајами Хит, Феникс Санс, Кливленд Кавалирс и Бостон Селтикс. Во текот на кариерата носеше дресови со различни броеви, додека во Орландо остана запаметен по 32-ката која во иднина ќе ги краси трезорите на „Емвеј Сентр“.
„Знаете, постои онаа стара изрека: 'Никогаш не заборавајте од каде дојдовте'. Мојата професионална кариера започна овде. Поголемиот дел од мојот живот го поминав тука. Никогаш не мислев дека ќе дојде овој ден“, рече Шек на церемонијата, каде освен семејства присуствуваа и поранешни играчи од неговата генерација.
Иако не освои ниту еден прстен со Орландо за време на неговиот четиригодишен мандат, О'Нил остави длабока трага во оваа франшиза, каде што, судејќи според вечерашниот прием, тој и понатаму е миленик на фановите.
