Играчите на Манчестер Сити со 2:0 го победија и исфрлија Челси од англискиот Лига Куп, а сите прстот го вперуваaт кон скапиот дефанзивец Калиду Кулибали.
Централниот дефанзивец на Челси, за кого „Сините“ летоска мораа да му искешираат 40 милиони евра на Наполи, поштено се избрука со својата реакција додека стоеше во живиот ѕид при голот од слободен удар на Ријад Махрез.
Резултатот на „Итихад“ беше без голови кога во 53. минута домашните добија слободен удар од идеална позиција. Махрез очајнички бараше место каде да ја упати топката поради одлично наместениот жив ѕид на гостите, и на крајот одлучи да шутира над главата на Кулибали. За негова среќа, единствен кој не скокна да блокира висока топка беше токму Сенегалецот, па ударот на Махрез непречен стигна до голот на Челси, Едуар Менди беше немоќен и резултатот беше отворен.
Со право сите го напаѓаат Кулибали бидејќи не се ни потруди да ја блокира топката, остана како здрвен и е главен виновник за водството на Сити. Да биде бељата поголема, кратко потоа, по само 5 минути, „Граѓаните“ го дуплираа водството преку Хулиан Алварес.
Така, Сити многу полесно од очекувањата мина во осминафиналето, а Челси остана вон игра и за уште еден трофеј.
