Воздухот во Сараево утринава е најзагаден во светот, покажуваат податоците на AirVisual. Индексот на (лош) квалитет на воздухот е 198.
На неславната листа по Сараево се Дака (Бангладеш), Мумбај и Калкута (Индија), Шенјанг (Кина), Скопје, Инчеон (Јужна Кореја), Загреб, Милано...
Скопје е на шестото место со индекс од 170. Ако индексот за квалитет на воздухот е од 0-50 тогаш е здрав, од 51-100 е умерено загаден. Сè што е повеќе од 100 е нездраво, а повеќе од 300 е опасно по здравјето.
Концентрацијата на штетните ПМ2,5 честички во Сараево утринава изнесува 146 микрограми на метар кубен, што е 29,2 пати повисока од вообичаените параметри за вредности на квалитетот на воздухот според Светската здравствена организација.
Во такви услови, лицата со респираторни заболувања, како што е астмата, може да доживеат значително зголемување на симптомите и интензитетот на болеста, а се зголемува и веројатноста за негативни последици по респираторните органи на целата популација.
Скопје пред два месеца се искачи на третото место по загаденост на листата на поголеми градови во светот - со индекс на загаденост од 182, според интернет платформата IQAir, која објавува сопствени податоци за загаденоста во градовите ширум светот во реално. Тогаш први на листата беа Делхи во Индија со индекс од 215 и Лахор во Пакистан со 255.
Студиите за загадување во главниот град покажаа дека воздухот во Скопје нема да се прочисти целосно сè додека масовно се користи дрвото за огрев. Но, покрај согорувањето на биомасата коешто претставува најголем извор на загадување на амбиенталниот воздух, како „трујачи“ на воздухот се посочуваат и индустријата и градежништвото. Загадуваат и автомобилите, поради што надлежните предлагаат алтернативи - пешачење, возење на велосипед и користење на јавен превоз, пишува Дојче веле.
