Прага се придружува кон градовите кои ја поттикнуваат доставата со карго-велосипеди.
За време на корона-кризата се зголемија онлајн нарачките, а Градот Прага со цел да го релаксира јавниот простор во центарот од доставата со тешки возила, на местото на паркинг од само 30 автомобили го формира претоварниот логистички центар за карго-велосипеди кој засега ќе го користат 7 компании за достава, а ќе се приклучат уште 4.
Депото има загреани простории за куририте, мала кујна, тушеви, универзален полнач за е-велосипеди и сервис за велосипеди. Ќе работи како пилот проект 6 месеци и ќе биде регуларно евалуиран.
Има планови и за експанзија во пролетта 2021 со логистички хаб со автоматизирани шкафчиња за пратки. Ако операцијата е успешно оцената и од Градот и од логистичките компании, идејата е да се воведат поголеми рестрикции за достава со камиони во историскиот центар на Прага.
Веста ја споделија од #НаТочак, групата ентузијасти чија заедничка цел е подобро велосипедско Скопје, кои продолжуваат со активности за кревање на свеста и промовирање на културата на користење велосипед како превозно и рекреативно средство.
Како се намалува метеж во градовите, меѓу другото?
Со регулирање на термините на доставата на добра.
Како уште подобро се регулира доставата?
Со намалување на возилата за достава во последниот километар.
Поттикнување на достава на стока и услуги во последен километар со карго велосипеди го има како мерка и во Планот за унапредување на велосипедскиот сообраќај 2019-2021 на Град Скопје, но досега не е ништо направено на овој план.
НаТочак достави предлог-амандман за буџетот на Град Скопје за 2021 за поттикнување на достава со карго велосипеди, но не беше прифатен.
