Критичарот на Кремљ и лидер на руската опозиција, Алексеј Навални, кој моментално штрајкува со глад, сè потешко зборува и е значително ослабен, објави неговата сопруга на социјалните мрежи вчера, откако го посети во затвор.
44-годишниот Навални, истакнат противник на рускиот претседател Владимир Путин, најави штрајк со глад кон крајот на март, протестирајќи против затворската управа која одбива да го лекува од акутни болки во грбот и нозете.
Во објава на Instagram, Јулија Навални ја опиша неговата состојба откако разговараше со него преку телефон преку стаклена бариера.
„Сè уште е весел и оптимист. Но, зборува со тешкотии и понекогаш го закачува телефонот и се потпира на масата за да се одмори. Многу е ослабен, сега има околу 76 килограми на 190 сантиметри висина.“
Тоа значи дека Навални е ослабен 16 килограми откако минатиот месец пристигна во затворот во град лоциран на околу 100 километри источно од Москва.
„Сè уште не дозволуваат лекар да го прегледа“, додаде неговата сопруга.
Западните земји тврдат дека Навални бил неправедно притворен и дека треба да биде ослободен. Тој се врати од Германија во Русија во јануари откако се опорави од труење со нервен агенс.
Во февруари, тој беше притворен на две и пол години за кршење на условна казна, која ја прогласи за политички мотивирана. Во меѓувреме, Русија вели дека сè уште чека докази дали бил отруен на нејзина територија.
Администрацијата во затворот тврди дека му понудиле лекување, но тој одбил, пренесува Reuters. Навални беше префрлен во затворска клиника на почетокот на овој месец поради висока температура и кашлица.
Руската затворска служба вчера објави дека одбор на лекари го оценил неговото здравје како задоволително, па затоа тој бил вратен од клиниката во главниот дел од затворот на 9 април.
