Претставниците на Авганистан и Руската Федерација склучија договори за купување нафта и гас, а договорот наскоро треба да биде парафиран, соопшти Министерството за трговија и индустрија на Авганистан.
Според министерот за трговија Нурудин Азизи, страните постигнале договор за трансфер на нафта од Русија во Авганистан, а целиот процес бил многу предизвикувачки поради санкциите воведени и кон Авганистан и кон Русија.
„Некои од нашите технички тимови сè уште се во Русија и работат на детали како што се трансферите на пари. Со оглед на тоа што повеќето руски и авганистански банки се под санкции, трансакциите ќе се одвиваат преку трета земја“, рече Азизи, пренесува афганистанскиот медиум TOLONEnews.
Инаку, според податоците на Авганистанската трговска и инвестициска комора, обемот на годишната трговска размена меѓу Москва и Кабул порасна на 170 милиони долари.
Токму министерот за индустрија претходно изјави дека Авганистан сака да увезува нафта и гас од Русија во замена за други производи.
„Покрај тоа, имаме, на пример, сушено овошје, суво грозје и лековити билки. Авганистан низ историјата има испорачано големи количини суво грозје во Русија. Можеме да испорачаме стотици тони такви производи во Русија. На пример, цените на лековитите билки сега се многу високи, а Русија има потреба од такви суровини за лекови. И можеме да ги користиме за размена“, претходно ги претстави своите идеи талибанскиот политичар.
