Гадење, несвестица, понекогаш и смрт - тековниот топлотен бран во Европа фрли светлина врз опасностите од екстремни температури за некои професии и ги натера синдикатите да бараат подобра заштита за работниците.
Градежните работници во работна облека работат на топол асфалт. Сезонските земјоделски работници обилно се потат во оранжерии. Некои се принудени да работат во магацини без клима...
Покрај тоа што е тежок за поднесување за сите жители, топлотниот бран стана неподнослив за одредени активности кои во последните денови беа одбележани со неколку трагедии во јужна Европа.
Во Шпанија, работник на 50-годишна возраст починал откако доживеал „топлотен удар“ додека работел во магацин во предградието на Мадрид во петокот. Според итните служби, неговата телесна температура била 42,9 кога дошле да му помогнат, бил во несвест и се грчел.
Минатиот викенд во Мадрид, додека работел починал и 60-годишен маж, ангажиран еден месец во компанија за одржување на патиштата, додека друг 58-годишен работник на истото работно место бил хоспитализиран во вторникот, откако не се чувствувал добро.
Во Италија на почетокот на јули двајца земјоделски работници на возраст од 20 и 57 години загинаа додека работеле на температури повисоки од 40 Целзиусови степени, објавија локалните медиуми.
Двата случаи предизвикаа дебата во Италија за работа на екстремни жештини, една година по смртта на 27-годишен сезонски работник од Мали, што поттикна неколку региони да ја забранат работата во најтоплиот дел од денот.
Синдикатите сметаат дека е повеќе од кога било потребно да се земат предвид температурите на кои работат работниците за да се избегнат трагедии, особено имајќи го предвид фактот дека метеоролозите предвидуваат дека топлотните бранови во Европа би можело да се удвојат до 2050 година.
Двата смртни случаи во Италија, како и оние во Мадрид, „никогаш не требаше да се случат“, рекоа двата главни шпански синдикати UGT и CCOO, повикувајќи да се намали изложеноста на работниците на високи температури.
„На Европа ѝ требаат пропишани максимални работни температури“, објави Европската конфедерација на синдикати на Twitter, повикувајќи да се престанува со работа кога е премногу топло.
Ваквиот пристап го брани и Европскиот синдикален институт, истражувачки центар во Брисел, кој во извештајот повика да се разгледа прогласувањето на „термичкиот стрес поврзан со метеоролошките услови“ за „професионален ризик“.