Најмалку две лица загинаа, а деветмина се повредени откако торнадо го погоди италијанскиот остров Пантелерија, помеѓу сицилијанскиот и тунискиот брег.
Како што јавуваат италијанските медиуми, меѓу загинатите има пожарникар кој не бил на должност и 86-годишен маж. Двајцата биле во своите автомобили кога торнадото го зафатило крајбрежниот пат.
Четири лица од повредените се во критична состојба. Некои ќе бидат пренесени во сицилијанската престолнина Палермо.
Од невремето има урнати кровови и превртени автомобили.
Иако торнадата обично не се поврзуваат со Европа, секоја година се случуваат неколку стотици. За многу од нив нема информации бидејќи се јавуваат во некои оддалечени рурални области.
Годинава торнадо ја зафати и Чешка, при што загинаа 5 лица, а 150 беа повредени.