Денешната автобуска несреќа кај селото Боснек во соседна Бугарија, во која загинаа 46 лица, е најтешката автобуска несреќа во Европа во последната деценија, пишува France-Presse.
Француската новинска агенција направи преглед на најтрагичните автобуски несреќи кои во последните 10 години се случиле на Стариот континент. На врвот е токму последната, односно македонскиот автобус на Беса Транс.
Бугарија: Дури 46 лица, меѓу кои 12 малолетни, загинаа кога рано утринава во Бугарија се запали автобус кој сообраќал од Истанбул за главниот град на Северна Македонија, Скопје.
Португалија: 29 германски туристи загинаа кога нивниот автобус излета од патот кон ресторан на планинскиот остров Мадејра на 18 април.
Русија: Автобус падна од мост во замрзна река во Сибир на 1 декември, при што загинаа 19 лица.
Турција: 17 мигранти кои нелегално се превезувале преку Турција загинаа, а 36 беа повредени кога нивниот автобус се запали откако удри во столб на 29 март во близина на Карс во источниот дел на земјата. Повеќето од нив беа Иранци, Авганистанци и Пакистанци.
Бугарија: 20 аџии загинаа откако нивниот автобус се преврте во услови на силен дожд северно од Софија за време на патување во православен манастир на 25 август.
Германија: 18 возрасни туристи од Саксонија загинаа кога на 3 јули нивниот туристички автобус се запали по судир со камион во Баварија.
Италија: 16 лица, главно унгарски тинејџери кои се враќаа од скијање во Франција, загинаа на 21 јануари кога нивниот автобус се запали по несреќа во близина на градот Верона.
Русија: 16 лица загинаа кога на 6 октомври воз удри во расипан автобус со претежно узбекистански патници на железнички премин источно од Москва.
Франција: Во најтешката француска сообраќајна несреќа во последните три децении, 43 лица загинаа кога автобус со членови на пензионерски клуб се судри со камион и се запали во близина на Пусеген во југозападниот дел на земјата на 23 октомври.
Турција: Цистерна што превезуваше течен нафтен гас (ТНГ) се преврте и експлодираше на автопат во југоисточниот дел на земјата на 22 јули, при што загинаа 26 лица во двата автобуса кои минуваа и кои ги зафати пламенот.
Уште 21 лице загина во централна Турција во текот на ноќта на 23 јануари кога нивниот автобус се преврте на замрзнат пат.
Швајцарија: 28 лица, меѓу кои 22 деца, загинаа на 13 март во несреќа во Сјер, Јужна Швајцарија, додека се враќале во Белгија од скијање.
Турција: 25 лица, главно ученици, загинаа кога на 21 декември камион натоварен со цигли се судри со автобус во близина на Салат, село во југоисточната провинција Дијарбекир.