Мексикански нарко-бос кој се наоѓа на листата на најбарани во САД, беше уапсен вчера во Мексико, соопшти Министерството за воена морнарица за AFP.
Рафаел Каро Кинтеро е уапсен во северната држава Чивава, додаваат мексиканските медиуми. Извор од Министерството го потврди апсењето за AFP, но одби да даде детали.
Рафаел Каро Кинтеро (69) беше на списокот од десет бегалци барани од ФБИ за киднапирање, тортура и убиство на специјалниот агент на американската Агенција за борба против дрогата (ДЕА) Енрике „Кики“ Камарена во Мексико во 1985 година, според ФБИ.
Каро Кинтеро е еден од основачите на нарко картелот Гвадалахара
Вашингтон понуди 20 милиони долари за негово апсење. Мексиканецот е еден од основачите на првиот голем нарко картел во Гвадалахара во доцните 70-ти.
„Тој го задржа влијанието во картелот Синалоа и во организацијата за трговија со дрога Каро-Квинтер“, додаде ФБИ.
Првпат беше уапсен во 1985 година и осуден на 40 години затвор во Мексико. Поради формално правно прашање, тој беше ослободен во 2013 година. Набргу потоа, мексиканското правосудство повторно побара негово апсење.
Тој негира дека го убил американскиот агент
И САД повторно побараа негово апсење и екстрадиција за киднапирањето и убиството на Енрике „Кики“ Камарена, американски агент со мексиканско потекло, како и за трговија со дрога.
„Не го киднапирав, не го измачував, не го убив“, се бранеше во интервју за неделникот Proceso во јули 2016 година, додека сè уште беше во бегство. „Моја единствена вина е што бев на местото на злосторството“, рече тој.
Водачот на картелот Гвадалахара, Мигел Анхел Феликс Гаљардо, е во затвор од 1989 година поради убиството на Камарена. Тој негира учество во убиството.
