Украинските власти наидоа на бурни реакции откако беа објавени официјални слики на жени во воена обука како парадираат во штикли.
Украина се подготвува да организира воена парада следниот месец за одбележување на 30 години независност од распадот на Советскиот Сојуз, а Министерството за одбрана вчера објави фотографии од жени војници кои маршираат обуени во чевли со високи потпетици
„Денес, за првпат, обуката се одвива во чевли со високипотпетици“, рече кадетката Ивана Медвид.
„Малку е потешко отколку во воени чизми, но се трудиме“, додаде Медвид во коментарите.
„Тешко е да се замисли поидиотска, поштетна идеја“, рече Ина Совсун, член на партијата „Голос“, посочувајќи на здравствените ризици.
Таа исто така рече дека украинските жени војници се еднакви со мажите, ризикувајќи го својот живот и „не заслужуваат да бидат исмевани“.
Украина се бори со сепаратистите поддржани од Русија, на истокот на земјата, во конфликт во кој загинаа повеќе од 13.000 луѓе од 2014 година.
Олена Кондратјук, заменик претседател на парламентот, рече дека властите треба јавно да се извинат за „понижувањето“ на жените и да спроведат истрага.
Кондратјук рече дека повеќе од 13.500 жени се борат во актуелниот конфликт.
Повеќе од 31.000 жени сега служат во украинските вооружени сили, вклучително и повеќе од 4.000 офицери.
Изборот на обувки предизвика критики на социјалните мрежи ширум светот, како и во украинскиот Парламент и доведе до обвинувања дека војниците биле сексуализирани.
„Приказната за парадата во штикли е навистина срамна“, гласи реакцијата на еден Facebook корисник кој додава дека некои украински службеници имале „средновековен“ начин на размислување.
Други го обвинија Министерството за одбрана за „сексизам и мизогинија“.
„Штиклите се потсмев на жените наметнати од индустријата за убавина“, напиша една корисничка на социјалните мрежи.