Рембрант Харменсзоон ван Рајн е веројатно највлијателниот холандски сликар и еден од најголемите сликари во европската историја на уметноста.
1. Рембрант живеел во таканареченото Златно време на Холандија и бил водечки сликар во барокната ера (роден е на 15 јули 1606 година во Лајден, починал на 4 октомври 1669 година во Амстердам).
2. Рембрант бил одличен портретист и своите вештини, покрај класичните портрети, ги применувал и на големи историски и библиски теми.
3. Често сликал автопортрети, што бил еден вид експеримент со оглед на тоа што се сликал во различни фази од животот, односно се следел како што стареел.
4. Покрај сликарството, Рембрант бил доста добар и како графичар. Имал способност во гравурите да направи исклучително сложени детали на мал простор. Неговите гравури ги надминале границите на Холандија и му донеле меѓународна слава.
5. Ребрант бил господар на светлината и го покажувал односот светло-темно, кјароскуро. Таа игра на светлината придонесувала за драматичност на сцените, а на ликовите им давала карактер.
6. Рембрант ги прекршил правилата кои дотогаш важеле кога станува збор за сликање историски, алегориски и библиски композиции. Неговите ликови не биле формални, туку изгледале природно и спонтано. Неговите главни ликови се чини дека се подготвуваат за мисии или се релаксираат заедно, додека споредните фигури се природно распоредени околу една фокусна точка.
7. И покрај финансискиот успех, до крајот на 40-тите години од 17 век Рембрант го потрошил своето богатство и повеќе не можел да ја плаќа хипотеката. Ја продал куќата, многу предмети, слики од неговата колекција, како и својата печатница. Со семејството се преселил во помал дом и никогаш не се опоравил финансиски. Умрел во сиромаштија.
8. Кога еден критичар од 19 век рекол дека едно дело од Огист Роден е во истиот дух како на Рембрант, Роден одговорил: „Ме споредувате со Рембрант? Какво сквернавење! Со Рембрант, колосот на уметноста! Треба да клечиме пред Рембрант и никогаш никого да не споредуваме со него!“.