Овој петок во Пробишти ќе се одржи 9-тото издание на фестивалот кој промовира македонски бендови од рок сцената - Рудар рок фест.
Со почеток од 19 часот на повеќенаменското игралиште во Градскиот парк во Пробиштип во рамките на културните денови по повод 28 Август – Денот на рударите и големиот христијански празник Пресвета Богородица ќе се одржи деветтото издание на овој познат македонски рок фестивал.
„И оваа година се обидовме да ги заживееме основните карактеристики на овој рок настан од претходните години - хард рок музиката и промовирањето на нови бендови од македонската рок сцена. Па така, посетителите ќе имаат можност да уживаат во хард рок, панк и метал звуци на нашите изведувачи“, велат организаторите.
Не фестивалот посетителите ќе имаат можност и да си купат маичка и на тој начин да го поддржат настанот за да се организира и наредните години.
Настанот се реактивираше лани кога по 16 години пауза се врати на македонската музичка сцена благодарение на локални ентузијасти.
На Рудар рок фест 2023 ќе настапат:
Младиот хард рок бенд „ПрекуРед“, кои скоро го издадоа својот прв албум „Хаос“.
Понатаму, прогресив-рок бендот „Беседа“, победници на последното издание на Лузер Фест.
Домашните „Прв Ред“, во нивниот препознатлив панк-рок стил.
По примерот на ланската година, и сега ќе има кавер бенд, а тоа е „Ashborn“, кој ќе отсвири големи хитови од историјата на рок музиката.
За љубителите на тешките метал звуци годинава ќе настапат амбициозните „Мамут“.
За крај, ќе настапи истакнатото име од македонската рок сцена од осамостојувањето, а тоа е алтернативниот рок бенд „Ласт Експедишн“.
