Британски научници користеле вештачка интелигенција за да го анализираат платното „Madonna della rosa“ од почетокот на XVI век, за кое се верува дека е една од многуте Мадони насликани од италијанскиот ренесансен мајстор Рафаело Санти, и откриле дека лицето на една од четирите фигури е направено од друг сликар. На сликата Марија го држи бебето Исус, од левата страна се Јосиф и малиот Јован Крстител, а на масата е роза, од каде потекнува и насловот на сликата.
Платното изложено во шпанскиот музеј „Прадо“ во Мадрид е дискутирано и претходно, а некои експерти претпоставуваа дека ученикот на Рафаело, Џулио Романо, учествувал во неговото создавање. Други веруваа дека розата и долниот дел од сликата се направени од друг уметник.
Денес, професорот Хасан Угаил, директор на Центарот за визуелно пресметување и интелигентни системи на Универзитетот во Бредфорд, верува дека платното е навистина плод на раката на Рафаело, освен лицето на Јосиф.
„Користевме слики за кои беше потврдено дека се на Рафаело за да го обучиме компјутерот да го препознава стилот до најмалите детали, од удари со четка, палета на бои до сенки, сите аспекти на работата“, рече тој.
„Компјутерот гледа многу подлабоко од човечкото око, до микроскопско ниво“, објаснува Угаил.
„Кога ја тестиравме сликата 'Madonna della rosa' како целина, резултатите не беа задоволителни“, рече тој. „Затоа, тестиравме поединечни делови и така остатокот од сликата беше потврдено дека е на Рафаело, а лицето на Јосиф се покажа дека е единственото што веројатно не го направил“.
Алгоритмот за вештачка интелигенција е создаден од Угаил, кој тврди дека алгоритмот може да ја препознае автентичноста на работата на Рафаело со 98% точност.