По повод 60 години од раѓањето на принцезата Дијана, нејзините синови Вилијам и Хари зaeднo ја открија статуата во нејзина чест и изјавија дека секој ден мислат на мајка им која го сменила светот на подобро.
Свеченоста на откривањето на споменикот се одржа во реновираната градина на палатата Кенсингтон, каде Дијана живееше по разводот од Чарлс.
Принцовите, кои инаку не се во добри односи откако Хари со сопругата Меган Маркл и синот Арчи ги напушти кралските должности и се пресели во САД, на овој емотивен ден ги тргнаа настрана недоразбирањата и во добро расположение заедно го открија споменикот во чест на нивната покојна мајка.
Настанот го означи првото заедничко појавување на браќата по погребот на нивниот дедо – принцот Филип, што се одржа на 17 април годинава. Градината на Кенсингтон беше едно од омилените места на принцезата Дијана.
„Се сеќаваме на нејзината љубов, сила и карактер. Овие квалитети ја направија извор на добрина за целиот свет. Таа успеа да промени многу животи на подобро“, се вели во изјавата.
Бронзената статуа ја прикажува Дијана опкружена со деца во едноставно издание кое ја симболизира универзалноста на нејзиното наследство.
Хари и Вилијам се надеваат дека статуата „засекогаш ќе остане симбол на нејзиниот живот“. Мал број гости присуствуваа на свеченоста, а меѓу нив беше и братот на Дијана, Чарлс Спенсер.