Компанијата за вселенски туризам, Virgin Galactic, од денес почна со продажба на билети за патување во вселената.
Билетите се достапни јавно така што оние кои можат да си дозволат имаат шанса за лет со вселенски авион. Еден билет чини 450.000 долари, но првин треба да се уплати депозит од 150.000 долари.
Останатите 300.000 долари се уплатуваат пред летот. Апликацијата за купување билети е достапна преку официјалната страница на Virgin Galactic.
Засега не е познато кога ќе биде првиот лет за вселенски туристи. Ричард Бренсон, основачот на Virgin Galactic, леташе во вселената во јули, минатата година и тоа беше голем чекор кон комерцијалните летови.
Планиран е нов лет наречен Unity 23 наменет за тричлен екипаж од италијанските воздухопловни сили, но во септември сето тоа беше запрено поради дефект на вселенскиот авион. Беше соопштено дека со летови ќе се продолжи во 2022 година.
Првично, Virgin Galactic со продажба на билети почна пред скоро 10 години, а резервираа околу 600 луѓе. Се продаваа и во август минатата година за 450.000 долари кога беа продадени вкупно 100 билети.
Компанијата постави цел од 1.000 продадени билети пред првите комерцијални летови годинава.
Вселенскиот брод VSS Unity е претставен во 2016 година, а со него Бренсон леташе во вселената. Во 2021 година беше претставен новиот VSS Imagine. Во подготовка е и трет авион, VSS Inspire.