Чистењето и организирањето на целиот дом лесно може да излезе од контрола и да се претвори во стрес. Без разлика дали живеете во станот само неколку месеци или неколку години, постои голема веројатност за тоа време да сте успеале да акумулирате вишок работи што ви го отежнуваат организирањето и одржувањето на редот.
Иако расчистувањето може да изгледа прекомплицирано, имаме неколку трикови кои ќе ви ја олеснат целата авантура. Искористете го последниот период од оваа зима за навреме да се подготвите за пролетта и да влезете во сончевите денови растеретено и организирано.
Кујната е срцето на секој дом, па не е изненадување што оваа соба е често најпретрупана. Без разлика на нејзината големина, ќе добиете дополнителен простор со користење на вертикалните површини - ѕидовите и висечките елементи. Со инсталирање на дополнителна отворена полица или магнет за ножеви, ќе ги направите вашите најчесто користени додатоци секогаш на дофат и ќе го ослободите многу потребниот и никогаш доволен работен простор.
Не заборавајте на моќта на организаторите за фиоки, кои вечниот хаос во нив ќе го претворат во добро искористен простор. Организаторот на фиоки не само што ќе ги направи работите во фиоките попристапни и повидливи, туку и ќе го зголеми искористувањето на просторот.
Практична работа за складирање се и украсните полици на тркала (за чување овошје и зеленчук, на пример), кои лесно можете да ги преместите и на тој начин да ослободите делови од кујната кои моментално се користат.
Првиот чекор во уредувањето на дневната соба, велат експертите, треба да биде подобро искористување на постоечкиот простор и мебел. Размислете кои од сегашните парчиња можете да ги замените со мултифункционални варијанти, како масичка со простор за складирање или кауч со вградена полица за книги. Многу каучи имаат вграден дополнителен простор за складирање, па ако тоа не е случај со вашиот, размислете за оваа можност при вашето следно купување.
Декоративните корпи секогаш се добро решение и како украс и како помагало за складирање.
Исто така, ако го подигнете телевизорот и го закачите на ѕид, ќе добиете многу слободен простор на местото на неговата поранешна полица.
Полиците за книги нудат огромен број креативни опции за складирање на спомени, растенија, рамки за слики, уметнички дела и свеќи. Со замена на постоечките полици со повеќе или со додавање на неколку партиции, можете да добиете повеќе простор за складирање и играње со комбинации на бои и форми.
Доколку изнајмувате стан, не заборавајте да се консултирате со сопственикот пред да ги дупчите ѕидовите и да направите големи промени во станот.
Просторот под креветот е најдоброто решение за складирање на работи што поретко ги користите - сезонска облека и чевли и дополнителна постелнина.
Организацијата на плакарот ќе ви овозможи повеќе простор и подобра видливост. Не заборавајте да го користите просторот под чивилакот, каде што можете да чувате кутии со чанти, шалови и капи, и слично, а во просторот за складирање можете да чувате и книги, празнични украси, ќебиња и перници за гости. Со инвестирање во неколку дополнителни полици, организатори на фиоки или прегради, можете да постигнете двојно повеќе работи во вашиот плакар отколку во почетната верзија.
Изненадувачки е колку промени и ред може да се донесат со едноставно расчистување на средствата за хигиена од кадата и мијалникот. Мини висечките полици кои се лесни за закачување и монтирање можат целосно да ги растеретат површините што ги користите секој ден.
Површината на вратата може да претставува паметен дополнителен простор – со додавање куки за закачување крпи или користење на аголот зад вратата за дополнителна полица.
Но, не заборавајте на најважното нешто, како за бањата, така и за другите простории - клучот за добра организација е пред сѐ во ослободувањето од вишокот работи, што значи пред сѐ да се ослободите од работите што не ги користите или што повеќе не ви служат.
Иако е последен на списокот, ходникот е веројатно првото и најважното нешто што треба добро да се организира бидејќи го претставува првиот впечаток кога ќе влезете во домот, а последниот што ве испраќа кога ќе излезете. Затоа, важно е работите кои ви се важни и кои често ги користите да бидат видливи, добро организирани и секогаш достапни.
Посебно место за клучеви ќе ви помогне да не ги заборавите кога ќе излезете од домот, без разлика дали се работи за убав сад, корпа или кука за закачување.
Добрата организација на чевлите ќе го растерети просторот, а во тоа може да ви помогнат дополнителни полици или убави, украсни корпи за складирање.
Исто така, не заборавајте да одредите кутија или фиока за складирање на пошта, сметки или други ситници што ги внесувате во станот кога ќе влезете, а не знаете што да правите со нив додека не се раскомотите.
Кога се организирате, најважно е да се следите себеси и вашите потреби. Откако ќе откриете систем кој функционира за вас, сè потоа е само одржување ред и уживање во него. Целта на добрата организација е да создадете пријатен и функционален простор за себе. Затоа, не заборавајте во целиот процес да додадете и доза на забава.
