На улиците на Москва се појавија плакати на кои некои од најпознатите Швеѓани од 20 век се обвинуваат дека го поддржуваат нацизмот, што е знак за влошување на односите меѓу Русија и Шведска, нордиска земја која размислува да влезе во НАТО.
Два плакати со фотографии од шведскиот крал Густав Петти, писателката Астрид Линдгрен, филмскиот режисер Ингмар Бергман и основачот на ИКЕА Ингвар Кампрад беа залепени на автобуската постојка пред шведската амбасада со натпис: „Ние сме против нацизмот, тие не се“.
Уште еден постер со починати шведски познати личности е поставен на главна улица во центарот на Москва, јавија светските агенции.
– Шведска нема намера да се впушта во јавна полемика со руската организација Наша победа, која наводно стои зад овие плакати, соопшти шведското Министерство за надворешни работи.
– Во Русија повеќе пати се изнесени обвинувања за нацизам против земји и поединци кои изразуваат оправдана критика за руските постапки, се додава во соопштението.
Руската анексија на Крим во 2014 година и нејзината инвазија врз Украина која почна 24 февруари ги поттикна Шведска и Финска да ги преиспитаат своите безбедносни политики, а членството во НАТО се чини сè поверојатно.
Шведскиот министер за одбрана минатиот месец изјави дека барањето за членство во НАТО може да предизвика одговор од Русија, вклучувајќи кибер-напади и хибридни мерки како што се пропагандни кампањи.
Москва тврди дека нејзината „воена кампања во Украина е осмислена за да изврши демилитаризација и денацификација на земјата“. Киев и Западот тоа го отфрлија како неоснован изговор за неиспровоцирана агресивна војна против суверена демократска држава.
