Пет гола, пресврти, црвен картон и промашен пенал - сето ова го имаше во попладневната четвртфинална пресметка од Копа Италија помеѓу Аталанта и Лацио.
„Деа“ поведе прва уште во 7. минута кога албанскиот репрезентативец Берат Џимсити ја затресе гостинската мрежа.
Лацио брзо се разбуди и десет минути подоцна израмни со првиот гол во небесносиниот дрес на косовскиот корпулентен напаѓач Ведат Муричи, иако денеска неговиот тим настапи, несвојствено, во зелени дресови.
Финишот од првиот дел донесе возбудувања пред двата гола. Прво Франческо Ачерби во 34. минута се погрижи за целосен пресврт и водство на римјаните, но само три минути подоцна Украинецот Руслан Малиновскиј израмни на 2:2, резултат со кој се замина на пауза.
Вториот дел почна лошо за домашните бидејќи во 53. минута Хосе Паломино заработи директен црвен картон оставајќи ја Аталанта со десетмина во поле.
И покрај играчкиот недостаток, четири минути подоцна Русинот Алексеј Миранчук погоди за водство на Аталанта.
Потоа во 66. минута домаќините имаа колосална шанса да го дуплираат водството кога Весли Хут фаулираше за пенал, но Дуван Сапата го промаши пеналот.
Аталанта во полуфиналето ќе се сретне со подобриот од дуелот на Наполи и Специја, натпревар кој се игра утре вечер.
Вечерва од 20:45 се игра и натпреварот Јувентус - СПАЛ кој ќе го даде противникот на Интер во второто полуфинале.