Кинескиот производител на паметни телефони Xiaomi ја тужи американската влада.
Причината е потегот на Доналд Трамп за време на неговата последна недела како претседател на САД да ја стави компанијата на црната листа на Пентагон, што им забранува на Американците да инвестираат во неа.
Xiaomi вчера побара да биде отстранета од списокот, со образложение во тужбата до окружниот суд во Вашингтон дека одлуката да биде ставена на црна листа е „незаконска и неуставна“, пренесува Reuters.
Тие тврдат дека тоа нема никаква врска со Народноослободителната армија, посочувајќи на значителен број американски граѓани кои имаат големи удели во компанијата, а американските финансиски компании сочинуваат тројца од нејзините 10 најголеми инвеститори.
Xiaomi беше додаденa на црната листа минатиот месец, заедно со осум други компании, за време на заминувањето на администрацијата на Доналд Трамп, која бараше сите американски инвеститори да ги повлечат своите пари од компаниите до 11 ноември 2021 година.
Во моментот кога се најде на непопуларната листа, Xiaomi го надмина Apple и стана третиот најголем производител на паметни телефони во светот, според IDC.
Според Financial Times, администрацијата на Џо Бајден не објавила дали ќе ја задржи забраната. Но, новиот претседател најверојатно ќе се соочи со политички последици ако ја укине забраната поради притисокот од Капитол Хил каде имаат намера да одржат цврст став кон Кинеската комунистичка партија.
Бајден покажа рани знаци дека има намера да прифати остар пристап. Државниот секретар Ентони Блинкен оваа недела изјави дека се согласува со администрацијата на Трамп дека Кина извршила „геноцид“ во провинцијата Синџијанг со притворање и репресија на над милион муслимани Ујгури.
Покрај тоа, Пентагон во петокот ја обвини кинеската војска дека ја продолжува „низата агресивни и дестабилизирачки активности“, откако Financial Times објави дека кинески воени авиони симулирале напад врз американски носач на авиони за време на неодамнешниот упад во зоната за противвоздушна одбрана на Тајван.