Војската на Србија во копнената безбедносна зона, во близина на административниот премин Јариње со Косово денеска стационираше неколку топови и хаубици од голем дострел, јави дописникот на МИА од Белград.
Како што соопшти порталот Nova.rs, распоредувањето на артилериско оружје уследило откако началникот на Генералштабот на вооружените сили на Србија, Милан Мојсиловиќ, синоќа итно се упатил кон Рашка.
– Задачите што ги добија српските вооружени сили и јас како началник ќе бидат целосно спроведени и реализирани како такви. Ситуацијата е сложена, комплексна, бара присуство на вооружените сили на Србија долж административната линија и во следните периоди Војската на Србија, како праг на мирот и стабилноста, ќе биде насочена кон нивно извршување. Ги имаме сите информации во детали. Мора да знаете дека преземените мерки и добиените задачи ќе бидат целосно исполнети, изјави Мојсиловиќ за ТВ Пинк.
Медиумите во Белград синоќа објавија дека се слушнало рафално пукање во Зубин Поток на Косово, додека некои изјавија дека имало размена на оган меѓу локалните Срби и косовската полиција. Косовската полиција соопшти дека немало инциденти меѓу нејзини припадници и било каква група на северот на Косово.
Претставници на КФОР, како одговор на истрагата на Koha Ditore, соопштија дека имало пукање во Зубин Поток, но дека во тој инцидент нема повредени, а не е причинета материјална штета.
