Полицијата на Сан Диего уапси жена која вперила пиштол во полицаец додека полициска екипа ја бркала откако предизвикала сообраќајна несреќа и побегнала од местото на настанот. Инцидентот се случи при крајот на маратонот во Сан Диего, што предизвика паника кај присутните.
Еден полицаец случајно се застрелал самиот во нога додека траела акцијата и е пренесен во болница.
Полицијата соопшти дека е уапсена 58-годишната Мона Елиз Вилијамс откако вперила пиштол во полицаец. Вилијамс била уапсена на покривот на катна гаража.
Инцидентот се случи во близина на целта на маратонот Рокенрол во Сан Диего, а пукотниците за време на апсењето предизвикаа паника кај учесниците и присутните на маратонот.
Жената наводно била под истрага за киднапирање, што не е поврзана со овој инцидент.
Организаторите на мартонот соопштија дека инцидентот не е поврзан со трката, но дека од бебедносни причини, целната линија за околу 4.900 учесници на маратонот била преместена во „безбедна зона“.
Пукањето предизвика паника поради стравување од терористички напад на масовен настан, имајќи предвид дека во април, 2013 година имаше бомбашки напад на маратонот во Бостон и загинаа тројца, а беа повредени над 260 луѓе.
